Bazuar në përvojën e deritanishme të organizatës është konstatuar se familjet në nevojë vuajnë jetesën në kushte jashtë standarteve të asaj çka mund të konsiderohet njerëzore. Marrë shkas nga kjo mënyrë jetese është parë e arsyeshme të përqëndrohemi në ndërtimin e banesave të reja dhe rikonstruktimin e banesave aktuale. Deri tani janë ndërtuar 47 shtëpi, me të gjitha kushtet e nevojshme, ku bamirës të ndryshëm kanë vendosur të investojnë. Gjatë këtij viti Fundjavë Ndryshe ndërtoi gjithashtu një shkollë dhe po projekton ndërtimin e një qendre rehabilitimi për personat e varur nga lëndët narkotike. Gjithashtu është konceptuar dhe ndërtimi i një kampusi, i cili do të përmbajë 30 shtëpi, dy jetimore, një spital, një azil për të moshuarit dhe një shkollë profesionale. Synohet që pasi 30 familje të jenë trajtuar dhe të kenë dalë nga varfëria, të zëvendësohen me 30 familje të tjera në nevojë për të ndërtuar kështu një cikël që qarkullon.